اکبریم گلینجه ئولسـم دفنیمی یوباندیر عمّه
نعشیمی آلوب ال اوسته باشنه دولاندیر عمّه
****
یوخ سوزوم بوئولمک عمّه امر حیّ لَم‌یزلدی
باجیـلار ئولنـده امّـا قـارداشی اولا گوزلدی
ایلیون بیر آزجا تأخیر بلکـه اکبریمده گلدی
کفن و دفنیمی بیر آز سن ساخلا ال یوباندیر عمّه
****
گوزلرون فداسی اوللام خسته سن بی‌بی آز آغلا
ئولدورور ئوزین حرملر آز بو قلب زاری داغلا
اللرون قاداسین آللام گل بو گوزلریمی باغلا
قانلی اشگیلن سارالمش رنگون آز بویاندیر عمّه
****
گرچه قاره گون الیندن قورتارور بو بخت قاره
وار ولی بیر عُمده دردیم گل سنه ایدوم اشاره
ناگهانـی گلســه اکبـر گوزلـریمی آچ دوباره
اکبـری منیلـه بیـر آن روبـرو دایاندیـر عمّه
****
شمری سن چاغرما عمّه قلبیده جراحتیم وار
قولدان آچماسون طنابیم دلده آیری نیّتیم وار
قبـره قـوی بو حالتیلـن جدّیمه شکایتیم وار
سنده خلقه ظلم شمری نطقویله آندیر عمّه
****
باشون آچما ایتمه ناله قلبیم اولدی غصّه‌دن قان
سـن منــه آنالـق ایتــدون جانـوه رقیّـه قربان
باشیم آلما سینون اوسته تپراق اوسته قوی ویروم جان
زحمتیمی چوخ چکوبسن آز منی اوتاندیر عمّه
****
آغلامـا دیمـه غـریب بی‌وطـن رقیّه لایلای
هیچ دله گتورمه جسمی بیکفن رقیّه لایلای
سَسَله شمر شوم الیندن دینجلن رقیّه لایلای
قلب اهـل شامـی آه آتشینـه یاندیـر عمّه
****
بی‌سبب دینن بوغمده قانه گوزیاشیم دولانماز
الده ئولدوروب بوطفلی شمر دون گنه اوتانماز
قمچی‌لـر یرینـی امّا گـورمینجه خلق اینانماز
کوینگیم چخات بو خلقی سن ئوزون ایناندیر عمّه
آندیچمرم اوجانه- منزوی
