نیزه باشندا باشون گلموش بیانه قارداش
قـرآن تـلاوت ایلــر قرآنیـانـه قارداش
سیر جهـانه چخموش اوج سنانه قارداش
سیرینده رهبر اولمُوش بیرکاروانه قارداش
بیـر کاروانـدا رهبـر اهل جهـانه قارداش
****
یتدی دُونَن گون اورتا گون تک زواله باشون
گــوردوم جــداده بنـزر بـدر کمالـه بـاشون
دوتموشـدی پـرده پـرده قانیلـه هالـه باشون
گیتدون کول اُسته یاتدون دوندی هلاله باشون
بیر گونده تیز دونرمیش دور زمانه قارداش
****
بیر باش که آیت اولسون آیه به آیه نوره
نور رُخیله دُونسون صحـرا و دشت طوره
مینلَر کلیم عشقی سالسـون اوطور شوره
انصافـدور اوبــاشی خــولی قویـا تنوره
مهمان یک شَبیدون اول میزبانه قارداش
****
الله نـور- نـوری وار ناصِیَنــده پیـدا
مشکوتی نوک نیزه مصباحی حُسن زیبا
نه شـرقی و نه غـربی نور منیر بطحا
بوقوم بی‌بصیرت گورمز بو نوری دردا
بیگانـه گـوز گورنمـز نـور یگانه قارداش
****
ای مـاه چـارده شـب وی یکشبه هلالیم
آشفتــه روزگـارون آشفتـه وضـع حـالیم
شاهـد بو قانلـو زلفیـم خوناب اشگ آلیم
سن مندن آیریلارسان گیتمزدی هیچ گمانیم
گلمزدی بیرگونومده سنسیز گمانه قارداش
****
حاشـا بـو آیریلیقـدا دلده گلایَم اولسون
قوی پایۀ غمونجه عشقونده پایَم اولسون
غم مصحفونده باری بیر آیه آیَم اولسون
سایونده دالدالانّـام عالمده سایَم اولسون
سایونده دالدالانماق حقیمدی یا نه قارداش
****
بو سایه سایه سینـده پاینـده دولتیم دور
تسخیر ملک هستی معطوف همّتیم دور
ترویج دین و مذهب رسم طـریقتیم دور
بیر جمع قاره معجر مجمـوع قدرتیمدور
قیـد اسـارت اَلـدَه راه بهـانه قـارداش
****
تسخیر قیلماسام گر آفاقی غرب و شرقی
عرشه اوجاتماسام گر بو سرشکسته فرقی
یاندیرمـاسا یزیــدی بـو آه سـرد بـرقی
اونـدا وفای عهـد و سنماقینون نه فرقی
سوزدور سوزوم بوسوزدن غیری فسانه قارداش
****
ای آبــروی خلقـت وی افتخـار زینب
سندنصورا چوخالموش شأن و وقار زینب
دنیا بویونجا قالسون قوی یادگار زینب
هـم آبـروی زینـب هـم اعتبـار زینب
گلمز بو آبروده کیمسه جهانه قارداش
****
بیزدَندی جمله کون و امکانون آبروسی
بیزدَندی آب و گلـدن انسانون آبروسی
وار بالخصوص منـده زهرانون آبروسی
صرف‌نظـر بولاردان وار قانون آبروسی
باشدان آخوب بویانموش یوز گوز اوقانه قارداش
****
آند ایچمـرم اوجانه تا نقص عزّت اولسون
سوگند او خاک پاکه کویوندا تربت اولسون
زینبده گور نقـدری لازم‌دی همّت اولسون
شام ایچره عرش منبر سجّاده قسمت اولسون
مـدح علـی دیولسـون سفیانیانـه قارداش
****
قان قان دین بو شهرین قان یاغدیرور هواسی
بــوی جنــایتیلـه مملــوّ دور فضــاسی
عید عظیمـه دونموش دیـن مُبین عزاسی
بیریاندا کف چالوللّار بیریاندا دَف صداسی
هریـان نوای نای و چنگ و چغانه قارداش
****
گوردوم بو پست قومون رفتارینی دونَندَه
شرم و حیا تاپولماز بولدوم چالوب گولَندَه
بیـر انقـلاب روحـی پیـدا اولوندی منده
بـو انقـلاب روحه تنـگ اولدی یر بدنده
جسمیمـده افتخـاره گوردوم نشانه قارداش
****
آلدیم بو انقـلابین طغیـان جذر و مدّین
بولـدوم تجـاوز ایستر مرز وجـود حدّین
راه تعـادلیندن تاپــدوم او دمــده ردّین
باشیم یاریلماقندان گوردوم طریق سدّین
باش ووردوم اوندا بیر باش تخت روانه قارداش
****
باش پارچالاندی آخدی دوتدی یوزی قزلقان
قانلـو شفقـده گویــا بیــر آفتـاب تـابان
قانلـو شعاع سالدی دنیانی قویدی حیـران
دُونـدی زمانـه دوری تغییـر تاپدی دوران
گـردون دولانـدی کـام اسلامیانه قارداش
****
رحمت گوزیلـه باخدیم بوقوم بی‌حجابه
بیر روح تازه ویردیم دلمُرده شیخ و شابه
تـا مستعــدّ قیلــدیم افکــاری انقلابه
حمد ایلدیـم خدایه تا باشلادیـم خطابه
ظن ایتدیلـر علیـدور گلموش بیانه قارداش
****
بیـر لهجـه ده دانشدیم گویا علی اوزیـدی
لهجه علـی بیانـی سوزلر علـی سوزیـدی
بیر شهر بیـر منیدیم خلقین ایکی گوزیدی
سوزلر که من یتوردوم هر سوزلرین گوزیدی
هر کلمه مرغ روحه خوش آب و دانه قارداش
****
دشمن خبر بولونجه پرده کنار اولوندی
پرده کنـار اولانـدا حقّ آشکار اولوندی
بالمرّه آل سفیان منفور و خوار اولوندی
بنیـاد انقـلاب خلـق استـوار اولـوندی
باشلاندی بُغض و نخوت سفیانیانه قارداش
آندیچمرم اوجانه- ذهنی زاده
